​

تابع حسام بوجي، تعليقات القراء بعد ظهوره في لايف مع جريدة «الوطن»، قائلا: «أنا مبسوط بتعليقات الناس وربنا عوضني خير ودي حاجة كبيرة وربنا له حكمة في ذلك، نفسي الناس تحبني».

وكشف «بوجي»، في لايف جديد مع جريدة «الوطن»، تفاصيل نشره الفيديوهات عبر وسائل التواصل الاجتماعي، قائلا: «أول لما ابتديت أظهر للناس ظهرت في التيك توك، وصاحبي (كعبو) هو اللي شجعني أظهر للناس ورفع فيديو، وعلى الليل جاب مشاهدات جامدة، وبقينا كل حد بننزل نصور».

لما كنت بتقدم في وظيفة بترفض بسبب التنمر

وعن حياته الشخصية، قال إنه يعمل بمحل بيع مستلزمات الملابس والخيوط، «أجري على قدي يادوب، وأنا من عائلة متوسطة الحمد لله، ووالدتي تدعمني وواقفة جنبي، أمي أكتر حاجة وأحسن حاجة في الدنيا».

كما أفصح عن مواصفات فتاة أحلامه، قائلا: «المهم تكون بنت حلال وتتقي الله فيا»، لافتا أنه يحلم بالتمثيل، «بجانب التمثيل نفسي ربنا يكرمني بوظيفة، أنا خريج خدمة اجتماعية ودرست وتعبت في الدراسة، وكون إني مش لاقي وظيفة دلوقتي من ضمن الحاجات اللي مضايقاني ولما كنت بتقدم في وظائف كان كله بيعترض بسبب التنمر».

نفسي أمثل مع الفنان كريم عبدالعزيز

وعن أكثر وقت شعر بها بحزن شديد بسبب التنمر به، قال «بوجي»، إنه كان حينها في الثانوية العامة، «حصلت وقتها مواقف كتير، يعني ممكن أبقى قاعد مع أصحابي ويشدوا مع حد بسببي، أبقى سبب خلاف أو مضايقة، عشان صحابي مش هيقبلوا حد يتريق عليا».

وأوضح أنه يتمنى شغل وظيفة أو الالتحاق بعالم الفن، لافتا أنه يحب الفنان محمد هنيدي، خاصة فيلمه «عسكر في المعسكر»، كما أنه يجب الفنانين أحمد السقا وكريم عبدالعزيز، «بعشق فيلم (خارج على القانون) لكريم عبدالعزيز، ونفسي اشتغل معاه».

وعن ردود أفعال الناس بعد ظهوره في لايف جريدة «الوطن»، قال: «التعليقات اللي شوفتها بجد حب الناس جميلة جدا بعد حب ربنا».