كل حاجه محتاج تعرفها عن تقنية المستقبل NFC  من طأطأ لسلام عليكوا

معظم الموبايلات الحديثة في الوقت الحاضر واللي هيتم انتاجها في المستقبل هيبقى فيها خاصية وتقنية مهمة جداً اسمها NFC  وبرغم فايدتها الكبيرة لاحظنا ان في ناس كتير متعرفش عنها حاجه.

وعشان كده في البوست ده هنتكلم بالتفصيل عن كل حاجه ليها علاقة بتقنية ال NFC  ونجاوب على أهم الأسئلة اللي محتاج تعرفها عن التقنية زي:

1. ايه هو ال NFC  ؟
2. مكانه فين في الموبايل ؟
3. التقنية بتشتغل ازاي ؟
4. ازاي اعرف الموبايل بتاعي بيدعم NFC ولا لا ؟
5. استخداماته ايه ؟
6. أمان ولا لا ؟

ايه هي تقنية الـــــــ NFC  ؟

تقنية وخاصية مهمة جدًا في موبايلك اسمها NFC وده اختصار لكلمة Near Field Communication يعني اتصال المدى القريب.

وبتوفر امكانية توصيل الموبايل بجهاز آخر بطريقة لاسلكية عن طريق تلامس الجهازين من الخلف ببعض ومن غير ما تحتاج Wi-Fi أو بلوتوث أو فتح الانترنت على خط الموبايل.

بس بشرط ان لازم يكون الجهاز التاني بيدعم التقنية بردوا.

مكانه فين في الموبايل ؟

تقنية NFC   عبارة عن شريحة الكترونية صغيرة موجودة في غطاء الخلفي للموبايل.

تقنية ال NFC  بتشتغل ازاي ؟

تقنية ال NFC  بتشتغل عن طريقة موجات الراديو اللي بتنقل البيانات بسرعة كبيرة جدًا عكس خاصية البلوتوث، وكمان ممكن اوصلها عن طريق جهاز ذكي بيدعم طاقة أو ملصق ذكي مش بيدعم الطاقة والكهراباء وهنتكلم عن الملصق الذكي كمان شوية.

ازاي تعرف الموبايل بتاعك بيدعم NFC ولا لا ؟

من اعدادات الموبايل Settings ،  بعد كده المزيد More، لو لقيت كلمة NFC يبقى الموبايل بتاعك بيدعم التقنية.

اقدر استخدم التقنية في ايه ؟

1. الاستخدام الأهم والشائع للتقنية دلوقتي هو تبادل ونقل البيانات مهما كان حجمها بسرعة كبيرة جدًا بين الجهازين.
2. الدفع الإلكتروني عن طريق موبايلك بإستخدام تقنية NFC زي Google Pay أو Apple Pay أو Samsung Pay ، وبالرغم ان الخدمة دي ممكن يكون في ناس بتستخدمها على نطاق ضيق الا ان هيكون ليها دور كبير جداً في المستقبل.

وبدل ما كنت بتدفع عن طريق الفيزا وتاخد خطوات كتير في عملية الدفع هتدفع عن طريق تقنية NFC الموجودة في موبايلك بطريقة أسهل وأسرع.

1. اتصال الموبايل بالملصقات الذكية، وهي عبارة عن ملصقات مش بتحتاج لكهرباء عشان تشتغل وبيتم برمجتها بطريقة معينة، وبمجرد تلامس الموبايل معها هتخليه يعمل مهمة معينة بشكل اتوماتيكي.

ممكن تعمل ملصق ذكي بمجرد ما تلمس موبايلك بيه يقوم بفصل الإنترنت أو تفعيل وضع الطيران، أو فتح تطبيق الفيسبوك على سبيل المثال.

مثال 1 : ممكن تبرمج ملصق ذكي ويبقى على مكتب شغلك ولما تلمس موبايلك بالملصق يتم فصل الانترنت وتفعيل وضع الطيران على الموبايل بشكل تلقائي.

مثال 2 : اعمل ملصق الكتروني على باب اوضتك واول ما ترجع من البيت وتلمس موبايلك بالملصق، يفتح الواي فاي وتطبيق الفيسبوك على موبايلك بشكل تلقائي.

1. ممكن التقنية في المستقبل هتبقى موجودة في وسائل المواصلات الخاصة والعامة، يعني ممكن تقدر تفتح عربيتك أو تدفع أجرة المواصلات من خلال الموبايل بكل سهولة.

تقنية ال NFC أمان ولا لا ؟

بشكل عام هي من اكتر الوسائل الحديثة أمان، وده عشان عملية استخدام التقنية ونقل البيانات بيحتاج ان يكون موبايلك بشكل قريب جداً من الجهاز أو الملصق الأخر، وكمان بيتم تخزين وحفظ البيانات وتشفيرها على الموبايل بحيث ميقدرش اي شخص تاني يحصل على البيانات أو يقرأها.

ده غير ان التقنية هتطلب من موبايلك تسجيل دخولك عن طريق بصمة الأصبع أو التعرف على الوجه عشان تتأكد انك اللي بتستخدم التقنية بشكل فعلي وحقيقي.

تقنية NFC هيبقى ليها دور كبير ومهم جدًا في معظم المجالات في حياتنا وهيسهل علينا مهام كنا بنعملها في خطوات كتيره وبطريقة اسرع.

شركة Ehab Group من الشركات الرائدة في عالم التكنولوجيا والموبايلات، تقدر تتعرف اكتر علينا والمنتجات اللي بنقدمها بـــــ أقل سعر في مصر من خلال الموقع الإلكتروني: اسعار الموبايلات في مصر 2023