الخميس 26/أكتوبر/2023 - 11:35 م

حل الفنان آدم الشرقاوي، ضيفًا على أحد البرامج الإذاعية، وتحدث خلال اللقاء عن تفاصيل تقيدمه بطولة فيلم خمس جولات، ومشواره الفني.

ونستعرض لكم أبرز تصريحات آدم الشرقاوي الإذاعية:

 - أنا لغاية دلوقتي مبنامش كويس بسبب فيلم خمس جولات، ومكنتش عايز أدخل بطولة على طول وكمان في السينما، يعني أنا معنديش تاريخ علشان الناس تقول هروح اتفرج على فيلم ليا، وكانت مسؤولية كبيرة.

 - اتمرنت 6 شهور على الـ MMA وكنا عايزين شكل معين وجسم معين.

 - كان نفسي الفيلم ينزل على منصة مباشرة، لأن صعب حد يدخل السينما في التوقيت ده، كل واحد عنده كل حاجة في البيت، وفيه ناس في الساحل، وفيه دخول المدارس، وإحنا فيلم شبابي، وفيلم باربي نزل في نفس الوقت.

 - كانت حاجة كويسة إني أقدم نفسي للجمهور كممثل ممكن يعمل أدوار بطولة سينمائية، ودي أول خطوة في الطريق ده.

 - إن اسم ماجد المصري يتكتب قبل اسمي في تتر فيلم خمس جولات دي حاجة بين أستاذ ماجد وأستاذ يحيى المنتج، ولما سألوني قلت طبعا، ماجد المصري عنده تاريخ وبيمثل من سنين وكلنا بنحترمه، وهو ساعدنا جدا في الفيلم بخبرته.

-الأول مكنتش مبسوط إن الناس بتناديني بيج لإنهم مش عارفين اسمي الحقيقي، ولكن أنا دلوقتي مبسوط لإن الناس فاكرة الشخصية.

 - مايان السيد ملتزمة جدًا وبتذاكر، وبتجيب مدرب التمثيل معاها، وعايزة تطلع أحسن حاجة، ومش شايف إنها عملت حاجة وحشة في مسلسل 1000 حمد الله على السلامة، ومبسوط إنها عملت مخاطرة، وأشجعها تعمل مخاطرات جديدة، وأستاذة يسرا قالت لنا نفس الحاجة.

 - عنبة كان مركز جدًا في مسلسل 1000 حمد الله على السلامة، وعايز يطلع أحسن حاجة، ودخل اللوكيشن واثق من نفسه، وعمل شغل حلو مع إنها أول مرة يمثل وقدامه يسرا، وكان من أحسن الحاجات اللي في المسلسل ومبسوط إني قابلت عنبة.